(नमुना उत्तर)
(i) साहित्याची मागणी करणारे पत्र (औपचारिक)
दिनांक : 25 सप्टेंबर 2024
प्रति,
मा. विभाग प्रमुख,
स्वच्छता सप्ताह उपक्रम,
आदर्श विद्यालय, अहमदनगर.
ई-मेल : adarshvidya24@gmail.com
विषय : स्वच्छता सप्ताहासाठी आवश्यक साहित्याची मागणी.
महोदय,
मी अमर शाह, इयत्ता दहावीचा विद्यार्थी, विद्यालयाचा विद्यार्थी प्रतिनिधी या नात्याने हे पत्र लिहीत आहे. आपल्या विद्यालयात दि. 1 ऑक्टोबर ते दि. 7 ऑक्टोबर या कालावधीत स्वच्छता सप्ताहानिमित्त शालेय परिसर व वर्गखोल्या स्वच्छतेचा विशेष उपक्रम आयोजित केला आहे, याचा आम्हां सर्व विद्यार्थ्यांना आनंद वाटतो.
या उपक्रमात सुमारे 60 विद्यार्थी सहभागी होणार आहेत. त्यांच्यासाठी पुढील साहित्याची आवश्यकता आहे :
- खराटे व झाडू – 20
- सुपल्या/केरभरण्या – 15
- ओला व सुका कचरा वेगळा ठेवण्यासाठी कचराकुंड्या – 10
- हातमोजे व मुखपट्ट्या – 60
- बादल्या, फडकी व फिनाईल (वर्गखोल्यांची फरशी पुसण्यासाठी)
- कचरा भरण्याच्या पिशव्या
हे साहित्य दि. 30 सप्टेंबरपर्यंत उपलब्ध करून दिल्यास उपक्रम पहिल्या दिवसापासून सुरळीत पार पडेल. उपक्रम संपल्यावर सर्व साहित्य व्यवस्थित परत करण्याची जबाबदारी आम्ही घेतो. आमच्या मागणीचा आपण सहानुभूतीपूर्वक विचार कराल, अशी आशा आहे.
आपला नम्र,
अमर शाह
विद्यार्थी प्रतिनिधी, इयत्ता दहावी (अ)
आदर्श विद्यालय, अहमदनगर.
ई-मेल : amarshah.adarsh@gmail.com
(पत्र अमृता शाह लिहीत असल्यास ‘आपली नम्र, अमृता शाह’ असे लिहावे.)
किंवा
(ii) स्वच्छतादूतांचे अभिनंदन करणारे पत्र
दिनांक : 5 ऑक्टोबर 2024
प्रिय स्वच्छतादूत मित्र-मैत्रिणींनो,
सप्रेम नमस्कार.
आपल्या आदर्श विद्यालयात दि. 1 ऑक्टोबरपासून सुरू असलेल्या स्वच्छता सप्ताहात तुम्ही ‘स्वच्छतादूत’ म्हणून केलेले काम पाहून मनापासून आनंद झाला. विद्यार्थी प्रतिनिधी या नात्याने मी तुम्हां सर्वांचे हार्दिक अभिनंदन करते.
तुम्ही रोज सकाळी लवकर शाळेत येऊन शालेय परिसर व वर्गखोल्या स्वच्छ केल्या, ओला व सुका कचरा वेगळा केला आणि इतर विद्यार्थ्यांनाही स्वच्छतेची सवय लावली. तुमच्या परिश्रमामुळे आपली शाळा आज अधिक सुंदर व प्रसन्न दिसत आहे. दि. 7 ऑक्टोबर रोजी दुपारी 4 वाजता होणाऱ्या सत्कार समारंभात तुमचा विशेष सत्कार होणार आहे, याचा आम्हां सर्वांना अभिमान वाटतो.
स्वच्छता ही केवळ एका सप्ताहापुरती नसून आयुष्यभराची सवय आहे. तुम्ही घालून दिलेला हा आदर्श पुढेही कायम ठेवाल, याची मला खात्री आहे. पुन्हा एकदा अभिनंदन!
तुमची मैत्रीण,
अमृता शाह
विद्यार्थी प्रतिनिधी, इयत्ता दहावी (अ)
आदर्श विद्यालय, अहमदनगर.
ई-मेल : amritashah.adarsh@gmail.com
