सरस्वती विद्यामंदिरात प्रजासत्ताक दिन उत्साहात साजरा
जळगाव, दि. 26 जानेवारी (वार्ताहर) : येथील सरस्वती विद्यामंदिरात 26 जानेवारी रोजी प्रजासत्ताक दिन मोठ्या उत्साहात साजरा करण्यात आला. सकाळी 8 वाजता ध्वजारोहण झाले. प्रमुख पाहुणे माजी सैनिक श्री. रमेश पाटील यांच्या हस्ते ध्वजारोहण करण्यात आले.
त्यानंतर शाळेच्या पटांगणात मुख्याध्यापक श्री. एस. के. देशमुख यांच्या अध्यक्षतेखाली कार्यक्रम झाला. विद्यार्थ्यांनी देशभक्तीपर गीते व भाषणे सादर केली. ‘माझा भारत महान’ या विषयावर निबंध स्पर्धा व देशभक्तीपर नाट्यछटा झाल्या. शालेय राष्ट्रीय सेवा योजनेच्या विद्यार्थ्यांनी स्वच्छता मोहीम राबवली.
श्री. पाटील यांनी आपल्या भाषणात ‘राष्ट्राच्या प्रगतीत तरुणांचा वाटा मोलाचा आहे; शिस्त, प्रामाणिकपणा व देशप्रेम हेच खरे राष्ट्रसेवेचे लक्षण’ असे सांगून विद्यार्थ्यांना प्रेरणा दिली. या वेळी गुणवंत विद्यार्थ्यांचा सत्कार करण्यात आला. कार्यक्रमाचे सूत्रसंचालन शिक्षिका सौ. कुलकर्णी यांनी केले तर आभार श्री. जोशी यांनी मानले. शेवटी मिठाई वाटून कार्यक्रमाची सांगता झाली.