रक्तदान श्रेष्ठ दान
रक्त हे असे औषध आहे जे कोणत्याही कारखान्यात तयार होत नाही; ते केवळ माणसाच्या शरीरातच तयार होते. अपघात, शस्त्रक्रिया, प्रसूती, अॅनिमिया व कर्करोगासारख्या आजारांत दररोज हजारो रुग्णांना रक्ताची गरज भासते. रुग्णाला वेळेवर रक्त मिळाले नाही तर त्याचे प्राण जाऊ शकतात.
रक्तदान केल्याने दात्याच्या शरीरावर कोणताही दुष्परिणाम होत नाही. निरोगी व्यक्ती तीन महिन्यांतून एकदा रक्तदान करू शकते; शरीरातील रक्त चार आठवड्यांत पुन्हा तयार होते. एका रक्तदानाने तीन रुग्णांचे प्राण वाचू शकतात. रक्तदानामुळे हृदयविकाराचा धोका कमी होतो व शरीरात नवीन रक्त तयार होते, असे डॉक्टर सांगतात.
पण अजूनही अनेकांना अंधश्रद्धा आहे. रक्तदान केल्याने अशक्तपणा येतो, असे त्यांना वाटते. याबाबत जनजागृती आवश्यक आहे. शाळा-महाविद्यालयांत रक्तदान शिबिरे, तरुणांनी स्वेच्छेने रक्तदान, तसेच रक्तदात्यांची यादी ठेवणे यामुळे ही गरज भागवता येईल.
दुसऱ्याच्या जीवनासाठी आपले रक्त देण्यापेक्षा मोठे दान नाही. ‘रक्तदान हेच श्रेष्ठ दान’ या भावनेने प्रत्येकाने पुढे यायला हवे; तरच एकही रुग्ण रक्ताअभावी मरणार नाही.