जनता विद्यालयात राष्ट्रीय विज्ञान दिन उत्साहात साजरा
कामठी, दि. 28 फेब्रुवारी (वार्ताहर) : येथील जनता विद्यालयात 28 फेब्रुवारी रोजी राष्ट्रीय विज्ञान दिन मोठ्या उत्साहात साजरा करण्यात आला. कार्यक्रमाचे उद्घाटन प्रसिद्ध विज्ञान शिक्षक श्री. एस. के. देशमुख यांच्या हस्ते झाले.
या निमित्त विद्यार्थ्यांनी विज्ञान प्रदर्शन भरवले. सौरऊर्जेवर चालणारे खेळणे, पाणी शुद्ध करणारे साधे यंत्र, वायूप्रदूषण दाखवणारे मॉडेल, जलचक्र व रोबोटचे मॉडेल ही प्रदर्शनाची आकर्षणे ठरली. ‘विज्ञानाचा वापर माणसाच्या हितासाठी’ या विषयावर भाषण स्पर्धा व प्रश्नमंजुषाही झाली.
मुख्याध्यापक श्री. आर. पी. जोशी यांनी ‘विज्ञानाची आवड लहानपणापासून जोपासली पाहिजे’ असे सांगून विद्यार्थ्यांचे कौतुक केले. शिक्षक, पालक व विद्यार्थी मोठ्या संख्येने उपस्थित होते.