खालील मुद्द्यांच्या आधारे एक परिच्छेद तयार करा. (७ ते ८ वाक्यांत)व्युत्पत्ती कोश : निर्मितीचा ठराव, निर्मितीची जबाबदारी, निर्मितीसाठी अर्थसाहाय्य, त्याचे प्रकाशन

मराठी भाषेतील शब्दांचे मूळ समजावे यासाठी मराठी व्युत्पत्ती कोशाची निर्मिती करण्यात आली. १९३८ साली मुंबई येथे अखिल भारतीय मराठी साहित्य संमेलन भरले होते. स्वातंत्र्यवीर सावरकर या संमेलनाचे अध्यक्ष होते. ‘व्युत्पत्ती कोश रचनेचे कार्य हाती घ्यावे’, असा ठराव या संमेलनात मंजूर करण्यात आला. या कार्याची जबाबदारी कृ. पां. कुलकर्णी यांच्यावर सोपवण्यात आली. बॅ. मुकुंदराव जयकर यांच्या आर्थिक सहकार्यामुळे आणि श्री. दाजीसाहेब तुळजापूरकर यांनी पुरस्कृत केल्यामुळे कोशनिर्मितीला भरीव मदत झाली. १९४६ साली या मराठी व्युत्पत्ती कोशाचे पहिले प्रकाशन झाले. त्यानंतरही या कोशाच्या अनेक आवृत्त्या निघाल्या आहेत.