स्वमत.(अ) ‘लेखकाला वाघिणीतील आईची झलक जाणवली’, हे विधान पाठाच्या आधारे स्पष्ट करा.

वाघीण जंगलातील हिंस्र आणि धोकादायक प्राणी असली, तरी तिच्यातही मायाळू आई दडलेली असते, हे लेखकाने अनुभवले. शिकारीला जाताना तिने पिल्लांना नाल्याकाठच्या जांभळीच्या दाट झुडपात लपवून ठेवले होते. परत आल्यावर ‘ऑऽ वऽ’ असा आश्वासक आवाज करून तिने पिल्लांना बोलावले. रात्रभरच्या वाटचालीने थकलेली असूनही ती पिल्लांचा दंगाधोपा सहन करत होती; मध्येच एखाद्या पिल्लाला मायेने चाटत होती. पिल्लाने अंगावर पाणी उडवले तेव्हा फक्त मंद गुरगुरून नापसंती दाखवली. निघताना पिल्ले मागे येताहेत की नाही हे वळून पाहिले आणि खेळात दंग पिल्लांना पुन्हा हाक मारली. तसेच केलेल्या शिकारीकडे ती पिल्लांना घेऊन गेली. या सर्व कृतींतून लेखकाला वाघिणीतील आईची वेगळीच झलक जाणवली.