5. (आ) (3) कथालेखन : खालील मुद्द्यांच्या आधारे कथालेखन करा :एक खोडकर मुलगा – गुरे राखण्यास रानात जाणे – अनेक खोड्या – एक दिवस ‘लांडगा आला रे आला’ असे ओरडणे – लोक काठ्या घेऊन धावत येणे – मुलगा हसत सुटणे – असे अनेक वेळा करणे – एक दिवस खरा लांडगा येणे –…

Answer: कथा ‘खोटेपणाची शिक्षा’ (शीर्षक, मुद्द्यांनुसार कथा आणि तात्पर्य)

खोटेपणाची शिक्षा

एका गावात रामू नावाचा एक खोडकर मुलगा राहत होता. रोज सकाळी तो गावातील गुरे घेऊन रानात चरायला जात असे. रानात दिवसभर एकटे बसून त्याला कंटाळा येई, म्हणून तो कोणाच्या ना कोणाच्या खोड्या काढत राही.

एके दिवशी त्याला एक कल्पना सुचली. तो जोरजोरात ओरडू लागला, ‘लांडगा आला रे आला! वाचवा!’ शेतात काम करणारे लोक हातात काठ्या घेऊन धावत आले. पाहतात तर काय, लांडगा कुठेच नव्हता आणि रामू पोट धरून हसत होता. लोक चिडून परत गेले. रामूला ही गंमत फार आवडली. पुढे त्याने अशीच फसवणूक अनेक वेळा केली.

एके दिवशी खरोखरच झुडपातून एक लांडगा बाहेर आला. घाबरलेला रामू जिवाच्या आकांताने ओरडू लागला, ‘लांडगा आला रे आला! धावा!’ पण ‘हा पुन्हा थट्टा करतो आहे’ असे समजून कोणीही मदतीला आले नाही. लांडग्याने कळपातील अनेक शेळ्या-मेंढ्यांचा फडशा पाडला. रामू रडत रडत गावात परतला. आपल्या खोटेपणामुळे केवढे नुकसान झाले, हे त्याला तेव्हा कळले आणि त्याने पुन्हा कधीही खोटे न बोलण्याचा निश्चय केला.

तात्पर्य : वारंवार खोटे बोलणाऱ्यावर खरे बोलल्यावरही कोणी विश्वास ठेवत नाही.